.
పర్యాటకులను ఆకట్టుకునేలా ‘ఓషన్‌ డెక్‌’ ప్రాజెక్టు ఏర్పాటు చేస్తామని విశాఖ మహా నగర ప్రాంత అభివృద్ధి సంస్థ (వీఎంఆర్‌డీఏ) ప్రకటించి 22 నెలలైంది.
- సీఆర్‌జెడ్‌ అనుమతుల కోసం నిరీక్షణ
- ఏడాది నుంచి ఏపీసీజెడ్‌ఎంఏ వద్ద పెండింగ్‌
- ఇప్పుడు కేంద్ర ప్రభుత్వం వద్ద…
- పూర్తయితే పర్యాటకులకు మధురానుభూతిని పంచనున్న ప్రాజెక్టు
(విశాఖపట్నం-ఆంధ్రజ్యోతి)
పర్యాటకులను ఆకట్టుకునేలా ‘ఓషన్‌ డెక్‌’ ప్రాజెక్టు ఏర్పాటు చేస్తామని విశాఖ మహా నగర ప్రాంత అభివృద్ధి సంస్థ (వీఎంఆర్‌డీఏ) ప్రకటించి 22 నెలలైంది. ఇప్పటివరకూ దానికి శంకుస్థాపన కూడా చేయలేకపోయింది.
ఆర్కే బీచ్‌ రోడ్డులో వీఎంఆర్‌డీఏ పార్కు వెనుక పాత లైట్‌ హౌస్‌ వద్ద ఓషన్‌ డెక్‌ నిర్మిస్తామని 2023 జూలైలో ప్రకటించారు. అది కోస్తా నియంత్రణ మండలి పరిధిలో ఉన్న భూమి. అక్కడ నిర్మాణాలు ఏమైనా చేపట్టాలంటే ఢిల్లీలోని పర్యావరణ, అటవీ, వాతావరణ మార్పుల శాఖ నుంచి అనుమతులు తీసుకోవలసి ఉంటుంది. ఇందుకోసం పరివేశ్‌ పోర్టల్‌లో వీఎంఆర్‌డీఏ అధికారులు ప్రాజెక్టు వివరాలు పొందుపరిచారు. ఇలాంటి వాటిపై ముందుగా ఆయా రాష్ట్రాలకు చెందిన కోస్టల్‌ జోన్‌ మేనేజ్‌మెంట్‌ అథారిటీ (సీజెడ్‌ఎంఏ) సమీక్షించి, అనుమతి ఇవ్వవచ్చునని సిఫారసు చేస్తే, అప్పుడు ఢిల్లీలోని అధికారులు పరిశీలిస్తారు. ఈ క్రమంలో ఏపీ సీజెడ్‌ఎంఏ అధికారులు ఏడాది పాటు దీనిని వెయిటింగ్‌లో ఉంచి, ఇటీవలె కేంద్ర సంస్థకు సిఫారసు చేశారు. అక్కడ ఇంకెంతకాలం ఆ ఫైల్‌ ఉంటుందో తెలియదు. వారు కూడా పచ్చజెండా ఊపితేనే ప్రాజెక్టు ముందుకు కదులుతుంది. వాటి కోసమే వేచి చూస్తున్నట్టు వీఎంఆర్‌డీఏ ఇంజనీరింగ్‌ ఉన్నతాధికారి ‘ఆంధ్రజ్యోతి’కి తెలిపారు. అనుమతులు రాగానే పనులు ప్రారంభించి ఆరు నుంచి తొమ్మిది నెలల్లో పూర్తి చేస్తామన్నారు.
ఇదీ ప్రాజెక్టు
వీఎంఆర్‌డీ పార్కు వెనుక తీరంలో 50 మీటర్లు, సముద్రంలో మరో 50 మీటర్ల పొడవున మొత్తం 100 మీటర్ల డెక్‌ ఒకటి నిర్మిస్తారు. అక్కడే రెండు అంతస్థుల భవనం వస్తుంది. డెక్‌ నుంచి సముద్రం లోపలకు నడుచుకుంటూ వెళితే…అక్కడ 60 మంది కూర్చొనేలా రెస్టారెంట్‌ ఉంటుంది. రెండు అంతస్థుల భవనంలో పై అంతస్థును వ్యూ పాయింట్‌గా అభివృద్ధి చేసి సందర్శకులను అక్కడకు అనుమిస్తారు. అక్కడి నుంచి సముద్రం, పరిసర ప్రాంతాలు కనువిందు చేస్తాయి. అక్కడే కూర్చొని కబుర్లు చెప్పుకొంటూ స్నాక్స్‌ తినే ఏర్పాట్లు కూడా ఉంటాయి. ఈ ప్రాజెక్టుకు రూ.7.8 కోట్లు అవుతుందని అంచనా వ్యయంతో వేశారు. డిజైన్లు కూడా తయారుచేశారు. పూర్తయితే వీఎంఆర్‌డీఏ తరపున పర్యాటకులకు మరో మంచి ప్రాజెక్ట్‌ అందుబాటులోకి వస్తుంది.